«Аталану» пабликран илнӗ сӑнӳкерчӗк

Пӗччӗкҫӗ чӑвашсем Наци библиотекинче Кӑвар чӗреллӗ Ҫеҫпӗл Мишши пурнӑҫӗпе пултарулӑхне тӗпе хурса йӗркеленнӗ куравра пулса курнӑ. Кун пирки халӑх тетелӗнчи «Аталану» пабликра пӗлтернӗ.

Унта хыпарланӑ тӑрӑх, аслӑ поэтӑмӑрӑн ҫӑмӑл мар ачалӑхӗ пирки пӗлнӗ, ҫав вӑхӑтрах Мишша сӑвӑ ҫырма ҫеҫ мар, илемлӗ ӳкерме те, тӑмран тӗрлӗ кӳлепе ӑсталама пӗлнине те ӑша хывнӑ.

Экскурсие вулавӑш ӗҫченӗ Антонина Андреева ирттернӗ.

Анна Егорова страницинчен илнӗ сӑнӳкерчӗк

Чӑваш Енре «Аваллӑхсӑр малашлӑх ҫук» фестиваль иртӗ. Ун вӑхӑтӗнче тӗрлӗ ӑмӑрту, экскурси йӗркелӗҫ, ӑсталӑх лаҫҫисем ӗҫлӗҫ, парнесемпе савӑнтарӗҫ.

Фестиваль нарӑс уйӑхӗн 15-мӗшӗнче Хӗрлӗ Чутай вӑтам шкулӗнче пулӗ.

Чӑваш Енӗн Вӗренӳ институчӗн ӗҫченӗ Анна Егорова халӑх тетелӗнчи хӑйӗн страницинче пӗлтернӗ тӑрӑх, фестиваль ӑмӑртӑвӗсем хушшинче:

«Ҫемье йӑли-йӗрки – ҫирӗп ҫемье никӗсӗ» (вӑтам е аслӑ классенче вӗренекенсен фольклор ушкӑнӗ чӑваш халӑхӗн хӑй тӑрӑхӗнчи пӗр-пӗр йӑли-йӗркине кӑтартса пани);

«Халӑх юрри – чунӑм уҫҫи» (вӑтам е аслӑ классенче вӗренекенсем чӑваш халӑх юррине юрлани);

«Ай, ташлар-и ташшине…» (шкулчченхи вӗренӳ организацийӗсенчи ачасем тата 1-11-мӗш классенче вӗренекенсем чӑваш ташши ташлани);

«Ҫыру ҫырсамӑр салтаксем патне» (2-11-мӗш классенче вӗренекенсем хӑйсем ҫырнӑ ҫырусене пӑхмасӑр пултаруллӑ каласа пани);

«Халӑх йӑли – пурнӑҫ йӗрки» (вӗрентекенсем чӑваш халӑх йӑли-йӗркине тӗпе хурса ирттернӗ уроксемпе урок тулашӗнчи ӗҫсем ирттерни);

«Ӑста аллинче ӗҫ вылять» (5-11-мӗш классенче вӗренекенсен алӑ ӗҫӗ тума вӗрентекен ӑсталӑх класӗ ирттерни);

«Мухтав сана, ҫӗнтерӳҫӗ салтак» («Ҫӗнтерӳ кунӗ ачасен куҫӗпе») (2-11-мӗш классенче вӗренекенсен ӳкерчӗкӗсен куравӗ).

Малалла...

demo-chrio.rchuv.ru сӑнӳкерчӗкӗ

5-11-мӗш классенче вӗренекен ачасен хушшинче чӑваш чӗлхипе, литературипе тата культурипе интернет олимпиада иртнӗ. Унта 33 ҫӗнтерӳҫӗ ятне тивӗҫнӗ.

Кӑҫалхи олимпиадӑна Чӑваш Республикин тата республика тулашӗнчи вӗренӳ организацийӗсен 5–11 класӗсенче вӗренекен тӑват ҫӗр ытла ача хутшӑннӑ, ҫав шутра – республика тулашӗнчен – 26 ача.

Олимпиадӑна ирттернӗ Чӑваш Республикин Вӗренӳ институтӗнче пӗлтернӗ тӑрӑх, «пӗтӗмӗшле илсен, интернет олимпиадӑна кӑҫал пысӑк хастарлӑхпа Шупашкар, Ҫӗнӗ Шупашкар хулисен, Патӑрьел, Вӑрнар, Вӑрмар, Канаш, Куславкка, Йӗпреҫ, Ҫӗрпӳ, Муркаш, Тӑвай, Сӗнтӗрвӑрри, Шупашкар округӗсен шкул ачисем хутшӑннӑ».

https://vk.com/album-136634421_306115415 альбомран илнӗ сӑнӳкерчӗк

Чӑваш Енре сӑвӑ вулакансен «Сӑмах хӑвачӗ» конкурс-фестивалӗ виҫҫӗмӗш хут иртнӗ. Вӑл хальхинче те Муркаш тӑрӑхӗнчи Калайкасси шкулӗнче пулнӑ.

Сӑвӑ калассипе кӑҫал 150 ача ӑмӑртнӑ. Ачасем хӑйсен ҫулне кура икӗ секцире ӑмӑртнӑ. «Эпир пулнӑ, пур, пулатпӑр!» секцире чӑваш халӑх поэчӗ Петӗр Хусанкай сӑввисене вуланӑ. «Муркаш сасси» секцире Муркаш районӗнче ҫуралнӑ поэтсен хайлавӗсене е Муркаш тӑрӑхне, халӑхне, паллӑ ҫыннисене халалланӑ сӑвӑсене вуланӑ.

1-4 классен хушшинче Петӗр Хусанкай сӑввисене 50-а яхӑн ача вуланӑ.

Ачасене чӑваш халӑх поэчӗ Юрий Сементер, Чӑваш Республикин культура тава тивӗҫлӗ ӗҫченӗ Виталий Романов, Чӑваш Республикин культура тава тивӗҫлӗ ӗҫченӗ Альбина Юрату тата Николай Кузьмин, чӑваш халӑх поэчӗ Раиса Сарпи, Чӑваш Республикин культура тава тивӗҫлӗ ӗҫченӗ Эдуард Бахмисов, чӑваш халӑх поэчӗ Светлана Асамат, Чӑваш Енӗн Наци вулавӑшӗн наци литературипе библиографи пайӗн тӗп библиотекарӗ Антонина Андреева хакланӑ.

Чӑваш кӗнеке издательствин сӑнӳкерчӗкӗ

Чӑвашла роман ҫыракансем кӑҫал та конкурса хутшӑнма пултараҫҫӗ. «Чӑваш романӗ» пултарулӑх ӑмӑртӑвне

Чӑваш кӗнеке издательстви виҫҫӗмӗш хут ирттерет. Конкурса халиччен кӗнекен пичетленмен чӑвашла алҫырусене йышӑнӗҫ. Ӗҫӗн А4 форматпа 700 страницӑран ытла пулмалла мар.

Конкурс ӗҫӗсене кӑҫалхи юпа уйӑхӗн 1-мӗшӗччен fed_ol@mail.ru электрон адреспа е почтӑпа ҫак адреспа ярса памалла: 428019, Шупашкар хули, Иван Яковлев проспекчӗ, 13-мӗш ҫурт, Чӑваш кӗнеке издательстви, «Чӑваш романӗ» конкурса».

Александр Степанов страницинчен илнӗ сӑнӳкерчӗк

2-мӗш классем валли кӑларнӑ «Чӑваш чӗлхи» вӗренӳ пособийӗ тӑрӑх интерактивлӑ хӑнӑхтарусем хатӗрленӗ. Вӗсене Шупашкар хулинчи 33-мӗш вӑтам шкулти чӑваш чӗлхипе литературине вӗрентекен Ирина Диарова хатӗрленӗ.

Кун пирки Александр Степанов педагог, чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ.

Александр Степанов страницинчен илнӗ сӑнӳкерчӗк

Чӑваш чӗлхи вӗренме тинтерех тытӑннисем валли сире 1-мӗш класс валли хатӗрленӗ интерактивлӑ хӑнӑхтарусен пуххи вырӑнлӑ пулмалла. Ӑна А.Блинов (Алпарух) тата унӑн ушкӑнӗ ҫырнӑ вӗренӳ пособийӗ тӑрӑх йӗркеленӗ. Хӑнӑхтарусене Шупашкар хулинчи 40-мӗш вӑтам шкулти чӑваш чӗлхипе литературине вӗрентекен Римма Гаврилова тунӑ. Ку хыпара Александр Степанов чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ.

«1-мӗш класс валли эпӗ пурӗ 34 вӑйӑ йӗркелерӗм. Ачасен ҫул тата пӗлӳ шайне шута илсе вӗсене ансатрах тума тӑрӑшрӑм. Вӗсем пӗрремӗш класра вӗренекенсем валли кӑсӑклӑ пулччӑр терӗм. Ку вӑйӑсемпе урокӑн кирек хӑш тапхӑрӗнче те усӑ курма пулать. Вӗсем ачасене урокра мӗн вӗреннине килте ҫирӗплетме те меллӗ», — пӗлтернӗ вӑл.

www.ixbt.com сайтран илнӗ сӑнӳкерчӗк

Яндекс команди фирма сервисне чӑваш калаҫӑвне тата синтез технологине ӑнланакан нейросете кӗртнӗ. Вӑл «Яндекс Тӑлмачра», «Яндекс Шыравра» тата «Яндекс Клавиатурӑра» пур.

Кун пек мелпе хальлӗхе унта икӗ чӗлхене ҫеҫ кӗртнӗ. Маларах, кӑҫалхи ҫулла, Яндекс тутар калаҫӑвне ӑнланма пуҫланӑ, халӗ, ав, — чӑвашла.

Чӑваш чӗлхи Яндексра 2020 ҫултанпа, анчах маларах сервис текстпа ыйтнине ҫеҫ ӑнланнӑ. Халӗ вӑл сасӑпа ыйтсан та ӑнланать. «Куҫаруҫӑ» приложенире чӑвашла диалог режимӗ те пур.

Яндекс Раҫҫейри халӑхсен чӗлхине интеграцилессине Федерацин наицональноҫсен ӗҫӗсен агентствипе, Раҫҫейри халӑхсен ҫурчӗпе тата регионсенчи чӗлхе институчӗсемпе пӗрле ӗслет.

Яндекса чӑвашла сасса ӑнланма Чӑваш патшалӑх гуманитари ӑслӑлӑхӗсен институчӗ пулӑшнӑ.

Чӑваш патшалӑх гуманитари ӑслӑлӑхӗсен институчӗ тата «Яндекс» чӑваш калаҫӑвӗн синтезаторне шухӑшласа кӑларасшӑн. Ку ӗҫе институт чӑвашла пӗлекен хӑй ирӗкҫӗсене явӑҫтарасшӑн.

Нумаях пулмасть видеоконференци мелӗпе ӗҫлӗ ушкӑнӑн черетлӗ тӗлпулӑвӗ иртнӗ. Унта малалла мӗнле ӗҫлемеллине палӑртнӑ.

Сӑмах май, Яндекс-куҫаруҫӑра чӑваш чӗлхи 2020 ҫулхи нарӑс уйӑхӗнче тупӑннӑ. Тӑватӑ ҫул ҫурӑран ӑна Google-куҫаруҫӑра пурнӑҫланӑ.

Владимир Живов страницинчен илнӗ сӑнӳкерчӗк

Питӗр хулинчи Киров районӗнчи халӑхӑн социаллӑ ыйтӑвӗсене тивӗҫтерекен комплекслӑ центрта паян чӑваш юрри янӑранӑ. Унти ватӑсем патне концертпа «Парне» чӑваш халӑх фольклор коллективӗ пынӑ.

Чӑваш коллективне ҫӳрекенсем тӑван халӑхӑмӑрӑн «Кӗр сӑри» йӑла-йӗркине кӑтартса панӑ. Ку уява кӗрхи ӗҫсем вӗҫленсен мӗн авалтан ирттернӗ. Ҫавӑн чухне ҫӗнӗ сӑра вӗретсе ӗҫнӗ.

Питӗрти чӑвашсен «Парне» ансамбльне 15 ҫул ытла Татьяна Ильина ертсе пырать.